Samkeppniseftirlitið blessar samruna Vestia og Teymis

Samkeppniseftirlitið telur ekki ástæðu til að hafast frekar að vegna samruna Vestia ehf. og Teymis hf. Þetta kemur fram í úrskurði sem birtur hefur verið á vefsíðu eftirlitsins.

Í kjölfar nauðasamninga í sumar eignaðist Vestia, sem er eignarhaldsfélag Nýja Landsbankans (NBI), 57% hlutafjár í Teymi en næst stærsti hluthafinn er Straumur með tæplega 8% hlut og það sem eftir stendur er í eigu annarra kröfuhafa.

Í umfjöllun Samkeppniseftirlitsins um málið segir að fram komií samrunaskrá að NBI hafi verið stærsti kröfuhafi Teymissamstæðunnar og að samruninn sé liður í fullnustu þessara krafna NBI á hendur Teymi.

Sagt er að til standi að selja eignarhlutinn í Teymi eins fljótt og hægt er með hliðsjón af ástandi fjármálamarkaða. Samkeppniseftirlitið telur að með framangreindu hafi NBI/Vestia náð yfirráðum yfir Teymi og um sé að ræða samruna í skilningi 17. gr. samkeppnislaga.

Samkeppniseftirlitinu hafa borist ábendingar þar sem því er í aðalatriðum haldið fram að fjárhagsleg endurskipulagning Teymis og lækkun skulda félagsins sem leiðir af umræddum nauðasamningum raski samkeppni.

Í máli þessu liggur fyrir að Teymi stóð frammi fyrir alvarlegum fjárhagslegum erfiðleikum. Án aðgerða hefði það leitt til gjaldþrots, sbr. upplýsingar sem fram koma í samrunatilkynningu. Þess í stað var gerður nauðsamningur og í honum felst að lánardrottnar telja hag sínum best borgið með því að Teymi og tengd félög starfi áfram svo unnt sé að selja þau síðar.

Til þess að stuðla að þessu var gripið til aðgerða sem lánardrottnar telja nauðsynlegar til að tryggja áframhaldandi starfsemi og verðmæti þessara félaga. Í þessu felst einnig að fyrrum eigendur Teymis tapa að öllu leyti eign sinni í félaginu og er því ekki um það að ræða að þeim sé hyglt með óeðlilegum hætti.

Afleiðing þessara ráðstafana er m.a. sú að Og fjarskipti starfa áfram á markaðnum í samkeppni við t.d. Símann.

Eins og að framan greinir telur Samkeppniseftirlitið að samruni þessa máls raski ekki samkeppni skv. þeim viðmiðunum sem felast í 17. gr. samkeppnislaga. Það ákvæði veitir að mati Samkeppniseftirlitsins ekki sjálfstæða heimild til að leggja mat á það hvort að lánardrottnar Teymis hafi lækkað skuldir félagsins óeðlilega mikið í tengslum við framangreinda endurskipulagningu. Kemur það atriði því ekki til skoðunar í þessu máli.