Gamli Landsbankinn vill milljarða frá Imon

Sex skuldamál gamla Landsbankans á hendur eignarhaldsfélaginu Imon ehf. verða tekin fyrir í Héraðsdómi Reykjavíkur á þriðjudaginn kemur. Eitt málanna er langstærst, en þar krefur bankinn Imon um fimm milljarða króna vegna láns til Imons fyrir kaupum félagsins í bankanum sjálfum, nokkrum dögum fyrir hrun í fyrrahaust.

Imon ehf. er eignarhaldsfélag í eigu Magnúsar Ármann þar sem hann situr einn í stjórn. Félagið keypti um fjögurra prósenta hlut í Landsbankanum fyrir um fimm milljarða 30. september í fyrra og voru kaupin alfarið fjármögnuð með láni frá Landsbankanum. Að veði voru stofnfjárbréf í Byr, en Imon var stærsti hluthafi Byrs.

Kaupin eru nú til rannsóknar hjá sérstökum saksóknara vegna gruns um markaðsmisnotkun, það er að kaupin hafi haft þann tilgang einn að hífa upp virði hlutabréfa í bankanum.

Nú ætlar gamli Landsbankinn í hart við Imon til að reyna að innheimta þessa fimm milljarða króna skuld, auk fimm annarra smærri skulda, en Landsbankinn var viðskiptabanki Imons. Stofnfjárbréf í Byr voru að veði fyrir öllum lánunum. Hvorki fengust nánari upplýsingar um smærri lánin fimm frá lögmanni Imons né skilanefnd Landsbankans.

Landsbankinn hefur þegar gert veðkall í félaginu og leyst til sín stofnfjárbréfin í Byr.

Að sögn Geirs Gestssonar, lögmanns Imons, er ágreiningur um fjárhæð krafnanna, á hvaða verði Landsbankinn hafi átt að leysa til sín bréfin í Byr og að hve miklu leyti skuli taka tillit til þess við útreikning á kröfufjárhæðinni.

„Við sjáum ekki að það hafi verið tekið tillit til þess við útreikning fjárhæðarinnar," segir Geir. Kröfurnar séu um það bil jafnháar upphaflegu lánsfjárhæðunum, auk vaxta, sem bendi til þess að annaðhvort hafi innleyst veð ekki verið reiknuð inn í kröfurnar, eða þá að stofnbréfin sem lágu að veði hafi verið metin mjög verðlítil.

Ekki fengust skýringar á kröfulýsingunum frá skilanefnd Landsbankans. Páll Benediktsson, upplýsingafulltrúi skilanefndarinnar, segir lögfræðinga hennar engar upplýsingar vilja gefa um málið að svo stöddu.stigur@frettabladid.is