Byr semur við erlenda lánardrottna

Byr sparisjóður og erlendir lánveitendur sjóðsins hafa gert með sér samkomulag vegna lánasamninga sem kveða á um lágmarks eiginfjárhlutfall umfram það sem fram kemur í lögum um fjármálafyrirtæki. Fram kemur í tilkynningu að allir lánveitendur samþykktu samkomulagið samhljóða.

Samkomulagið kveður á um að tímabundið sé fallið frá eiginfjárkröfum umfram lögbundið hlutfall.

Ragnar Z. Guðjónsson, sparisjóðsstjóri, segir þetta samkomulag hafa mikla þýðingu fyrir Byr sparisjóð þar sem það tryggi að erlendir kröfuhafar gefa sjóðnum svigrúm til að vinna sig út úr fjármálakreppunni.

Jafnframt segir Ragnar að í ljósi þeirra erfiðu aðstæðna sem uppi eru á fjármálamörkuðum heimsins sé þetta samkomulag Byrs og erlendu lánadrottnanna mikill sigur fyrir sparisjóðinn.