Vörumerki Bókabúðar Máls og menningar selt

Samkomulag hefur náðst milli Kaupangs og Pennans á Íslandi um kaup á vörumerkinu Bókabúðir Máls og Menningar. Kaupangur sem er eigandi að húsnæðinu á Laugavegi 18, þar sem Bókabúð Máls og Menningar hefur verið óslitið síðan 1961 taldi við hæfi að eignast vörumerkið sem á sér mikla sögu samofna húsnæðinu, að því er segir í tilkynningu frá aðilunum.

Fyrirhugað var að flytja vörumerkið Bókabúðir Máls og Menningar í annað húsnæði í SPRON húsinu við Skólavörðustíg, en vegna þess samkomulags sem náðst hefur milli Kaupangs og Pennans mun Eymundsson opna nýja bókabúð í SPRON húsinu við Skólavörðustíg.

Í tilkynningunni kemur fram að milli Kaupangs og Pennans á Íslandi ehf. ríkir sátt um samkomulagið.