Krónan veikst um fjögur prósent í júní

Krónan hefur veikst um tæp 4 prósent það sem af er júní mánuði. Það sem af er degi hefur hún veikst um 1,2 prósent. Dollarinn stendur nú í rúmum 128 krónum, evran er 181 króna, pundið stendur í tæpum 211 krónum og danska krónan er rúmar 24 íslenskar krónur.

Erfitt er að segja nákvæmlega til um hvað veldur veikingu krónunnar í júní mánuði. Jón Bjarki Bentsson, hagfræðingur hjá Greiningu Íslandsbanka, telur þó að vaxtagreiðslur til erlendra aðila um miðjan júní mánuð og áhyggjur af þeim sé stærsti áhrifavaldurinn.