Danskir kaupmenn óttast aðra jólamartröð

Danskir kaupmenn óttast nú aðra jólamartröð, það er að jólainnkaupin í Danmörku verði jafn slök og þau voru í fyrra.

Í umfjöllun blaðsins Börsen um málið segir að Danir spari nú mikið því þetta er síðasta árið þar sem hægt er að fá skattaafslátt af auknum lífeyrissparnaði. Kaupmennirnir óttast að þessi sparnaður muni leiða til hörmulegrar jólaverslunnar.

„Við erum þegar farnir að finna fyrir samdrættinum í augnablikinu og eigum ekki von á að staðan lagist fyrr en eftir áramótin," segir Alferd Josefsen forstjóri Irma. „Fyrir okkur er kreppunni alls ekki að linna og það er undarlegt í ljósi þess að tölur sína aukningu í neyslu almennings."

Steen Bocian aðalhagfræðingur Danske Bank er sammála Josefsen um áhrifa skattareglnanna á jólaverslunina og býst við því að verslunargeirinn verði fyrir barðinu á þeim þessi jólin.