Byr verður trauðla bjargað

Ekki liggur enn fyrir hvort ríkið leggur sparisjóðunum til eiginfjárframlag líkt og þeim stendur til boða samkvæmt neyðar­lögunum.

Átta sparisjóðir af þeim tólf sem enn starfa í landinu óskuðu eftir framlaginu í vor. Það hljóðar upp á samtals tuttugu milljarða króna. Byr fengi helming en Sparisjóður Keflavíkur (SpKef) fjórðung.

Kostnaður ríkisins við að bæta eiginfjárstöðu Byrs gæti orðið tæpir ellefu milljarðar króna og óvíst er hvort það dugi. Til við­miðunar lagði ríkið samtals níu milljarða á endanum inn í Arion banka og Íslandsbanka.

Þeir sem Fréttablaðið hefur rætt við, bæði innan fjármála­ráðuneytisins og í bankageiranum, segja málið enn á borði fjármálaráðherra. Margir telja það stranda á endurskipulagningu Byrs og SpKef. Viðkvæmust sé staða Byrs, sem tók við greiðslumiðlun sparisjóðanna eftir fall Sparisjóðabankans í vor.

Steingrímur J. Sigfússon fjármálaráðherra segir málið á borði síns ráðuneytis að því leyti að það hafi heimild til að leggja spari­sjóðunum til fjármagn sem svari til tuttugu prósenta af efnahags­reikningi þeirra á árinu 2007.

„Ef það dugar þeim til fjárhagslegrar endurskipulagningar er það í boði en það er fyrst og fremst á hendi sparisjóðanna sjálfra að vinna úr sínum málum. Svo þurfa þeir auðvitað að fá samþykki Fjármálaeftirlits og eftir atvikum kröfuhafa og fleiri aðila til að áætlan­irnar gangi upp," segir fjármálaráðherra, sem ekki vill tjá sig um núverandi stöðu málsins.

Þá vill Steingrímur ekkert segja um meinta afstöðu Alþjóðagjaldeyrissjóðsins (AGS) en samkvæmt upplýsingum Fréttablaðsins meinar AGS stjórnvöldum að borga inn í sparisjóðina. Vísað er til samnings Byrs við kröfuhafa um að framlagið renni til þeirra. AGS er sagt mótfallið slíkri meðferð á skattfé.

Breska ráðgjafarfyrirtækið Oliver Wyman veitir fjármálaráðuneytinu sérfræðiaðstoð um endurskipulagningu sparisjóðakerfisins. Fundað er reglulega í ráðuneytinu og dregur að lokum þess verks, að sögn Hjördísar Drafnar Vilhjálmsdóttur, ráðgjafa fjármálaráðherra.

Niðurstaða kann að liggja fyrir um eða eftir áramót. Einn möguleiki er að nýta tækifærið og skera fjármálakerfi landsins meira niður með tiltölulega litlum tilkostnaði. Hagkvæmt er talið að láta banka eða fjármálafyrirtæki taka yfir eignir og skuldbindingar Byrs ásamt greiðslumiðlun. Rætt hefur verið við MP Banka og Saga Capital um þetta. Þannig sparar ríkið sér framlagið á sama tíma og sparisjóðakerfið helst í óbreyttri mynd á landsbyggðinni.- jab