Ferðaþjónustan aflar 400 milljóna á dag í gjaldeyri

Árið 2009 er fyrir fjöldamörg fyrirtæki í ferðaþjónustu eitt besta rekstrarár í langan tíma og má gera ráð fyrir að erlendir ferðamenn komi með u.þ.b. 150 milljarða króna í erlendum gjaldeyri inn í landið - en það gera u.þ.b. 400 milljónir á dag að meðaltali.

Í tilkynningu frá Samtökum ferðaþjónustunnar segir að einn meginþáttur kreppunnar er vöntun á eftirspurn í þjóðfélaginu. Kaupmáttur Íslendinga hefur minnkað stórlega sem leiðir til lækkandi veltu í verslun og þjónustu með tilheyrandi gjaldþrotum. Það er því nauðsynlegt að fá erlenda ferðamenn til að auka viðskipti hér á landi.

Leiðin út úr kreppunni er m.a. að örva ferðaþjónustuna, leggja í meiri landkynningu til að tryggja áframhaldandi auknar gjaldeyristekjur og fleiri störf um land allt. Það þarf meiri fjárfestingu í markaðssetninguna til að tryggja að ríkið fái auknar tekjur í framtíðinni en helstu samkeppnisþjóðir eru um þessar mundir að setja mikið fé í markaðssetningu.

Svíar settu t.d. nýlega 2 milljarða aukalega til markaðsmála og greiðir ríkissjóður helminginn. Þannig eru flestar þjóðir að vinna þessa dagana til að draga úr áhrifum kreppunnar.

„Íslensk ferðaþjónusta hefur aldrei verið mikilvægari og má ekki láta sitt eftir liggja. Aukin viðskipti eru betri leið til tekjuaukningar en auknar skattaálögur," segir í tilkynningunni.