Samið um greiðslur til gömlu bankanna

Í vikunni munu fulltrúar fjármálaráðuneytisins ásamt fulltrúum nýju bankanna og ráðgjöfum þeirra funda með skilanefndum bankanna og ráðgjöfum þeirra.

Þar munu hefjast formlegar samningaviðræður sem eiga að miða að því að ná samkomulagi um greiðslu til gömlu bankanna fyrir yfirteknar eignir og ljúka jafnframt eiginfjármögnun nýju bankanna. Þetta kemur fram í tilkynningu frá fjármálaráðuneytinu um stöðu endurfjármögnunar nýju viðskiptabankanna.

Í tilkynningunni segir að á síðustu þremur mánuðum vinna verið innt af hendi í nýju bönkunum við að ganga frá nýjustu fjárhagsupplýsingum og viðskiptaáætlunum sem munu vera mikilvægur grundvöllur að samningaviðræðunum. Viðskiptaáætlanirnar taka meðal annars mið af matsvinnu þeirri sem unnin var af Deloitte og skilað var í apríl.

Fjöldi óformlegra funda með skilanefndunum, ráðgjöfum þeirra og fulltrúum lánadrottna gömlu bankanna hafa farið fram að undanförnu til að upplýsa þá um framvinduna og ræða mögulegt samningsuppgjör.

Jafnframt segir í tilkynningunni að Fjármálaráðuneytið telji „mikilvægt að gætt verði sanngirni við samningsgerðina og þar sem að báðir samningsaðilar hafa aðgang að nauðsynlegum upplýsingum, en þær liggja nú fyrir. Vonir standa til þess að viðræður gangi greiðlega fyrir sig þannig að hægt verði að ljúka þeim á skömmum tíma og ganga endanlega frá eiginfjármögnun nýju bankanna."