Aðsúgur gerður að Geir Haarde - eggjum rigndi yfir ráðherrabílinn

Gerður var aðsúgur að Geir Haarde forsætisráðherra rétt í þessu við Stjórnarráðið þegar Geir var á leið út úr húsinu. Að sögn sjónarvotta voru mikil læti fyrir framan húsið og rigndi snjóboltum meðal annars yfir ráðherrann. Geir komst við illan leik inn í ráðherrabifreið sína sem var umkringd fólki.

Greip lögregla til þess að draga upp kylfur sínar til og stugga fólki frá bílnum. Hann ók síðan á brott umkringdur lögreglumönnum undir skæðadrífu eggja.

Um þúsund manns eru á svæðinu en hópurinn flutti sig fyrir stundu yfir að Stjórnarráðinu vegna jarðarfarar sem fram fer í Dómkirkjunni við Austurvöll. Nokkrir hafa tekið sig til og sprengt flugelda á Arnarhóli auk þess sem eggjum rignir yfir Stjórnarráðið og þá lögreglumenn sem þar hafa stillt sér upp.

Óeirðalögregla hefur nú raðað sér framan húsið.