Bréfin ruku upp um 390 prósent

„Þetta er afskaplega góður samningur og jafngildir því að erfðaprófin eru komin í hillu í mjög stórri búð," segir Kári Stefánsson, forstjóri deCode en fyrir­tækið hefur selt bandaríska líftæknifyrirtækinu Celera rétt á notkun á þremur erfðaprófum sem meta líkurnar á áhættuþáttum á borð við hjartasjúkdóma og sykursýki.

Kári segir samninginn skipta miklu fyrir fjárhagslega endurskipulagningu deCode sem staðið hefur yfir frá í fyrra. Celera greiðir við undirritun og fær deCode hlutdeild af framtíðartekjum vegna þessa.

Kári reiknar með að fleiri samningar sem þessi eigi eftir að líta dagsins ljós á næstunni. „Innan fimm til tíu ára munu margir vilja eiga einstakan erfðafræðilegan prófíl til að hanna fyrir sig lífsstíl og draga úr líkum á að fá sjúkdóma sem þeir hafa tilhneigingu til að fá," segir hann.

Fjárfestar tóku fréttunum afar vel en gengi bréfa í fyrirtækinu rauk úr sextán sentum á hlut á miðvikudag í 78 sent í fyrstu viðskiptum gærdagsins. Fyrir ári stóðu þau í um 1,6 dölum á hlut

Gjaldeyrishöftin sem samþykkt voru á Alþingi undir lok síðasta árs hamla því að einungis þeir sem áttu hlutabréf eða fjáreignir erlendis áður en höftin tóku gildi geta keypt hlutabréf deCode. - jab