Norrænu milljarðalánin skila sér bráðlega í hús

Norðurlöndin hafa öll samþykkt að lána Íslendingum hundruð milljarða í erlendri mynt til að stuðla að fjárhagslegum stöðugleika hér. Viðræður standa yfir við Pólverja. Fjármálaráðherra er bjartsýnn á að Rússalán skili sér.

„Þetta er mjög ánægjulegt," segir Steingrímur J. Sigfússon fjármálaráðherra, en í gær samþykkti finnska ríkisráðið og sænska ríkisstjórnin að veita Íslendingum tæpa 150 milljarða króna lán í erlendri mynt til að stuðla að fjárhagslegum stöðugleika hér.

Finnar ætla að lána 325 milljónir evra, jafnvirði rúmra 58 milljarða króna á gengi gærdagsins, og Svíar 700 milljónir dala, jafnvirði níutíu milljarða króna. Þetta er hluti af samkomlagi við Norðurlöndin frá í nóvember í fyrra sem hljóðaði upp á 2,5 milljarða evra lán í heildina.

Skrifað verður undir samþykktirnar í næstu viku.

Danir og Norðmenn hafa þegar samþykkt lánveitingu hingað auk Færeyinga.

Norrænu lánin eru öll frá ríki til ríkis nema í tilviki Noregs en lánið þaðan er til Seðlabankans.

Lánin öll koma til viðbótar við 2,1 milljarðs dala lán frá Alþjóðjagjaldeyrissjóðnum (AGS) og eru hluti af samstarfsáætluninni við sjóðinn. Steingrímur segir þau byggjast á því að samstarfið haldi áfram. Ekki stendur til að endurskoða það, að sögn Steingríms, sem býst við að annar hluti AGS-lánsins skili sér í hús um miðjan næsta mánuð.

Spurður hvort deila stjórnvalda hér við Breta vegna Icesave-innlánsreikninganna hafi tafið fyrir norrænu lánunum segir Steingrímur svo ekki vera. „Við höfum litið svo á að deilur okkar við Breta séu tvíhliða. Aðrir kunna að hafa litið öðruvísi á málið og haft tilhneigingu til að tengja þetta saman. Við höfum ekki gert það."

Viðræður standa enn yfir við Pólverja og Rússa um lánveitingar. Steingrímur segir þær ganga ágætlega. Raddir hafa verið uppi um að ólíklegt sé að Rússalánið, sem kom óvænt inn í myndina skömmu eftir bankahrunið í október í fyrra, muni nokkurn tíma skila sér.

Steingrímur telur þvert á móti líklegt að Rússalánið, sem hljóðar upp á hálfan milljarð Bandaríkjadala, muni skila sér. „Rússar hafa ekki viljað slíta viðræðunum. En þær er skammt á veg komnar," segir hann.