Nýtt þjálfarateymi hjá KR - Þrír leikmenn skrifuðu undir samninga

Íslandsmeistarar KR í körfubolta gengu í gærkvöld frá samningum við nýtt þjálfarateymi og þrjá leikmenn fyrir komandi tímabil í Iceland Express-deildinni en greint var frá þessu á heimasíðu KR í dag.

Páll Kolbeinsson verður sem kunnugt er aðalþjálfari liðsins en Guðmundur Þór Magnússon verður honum til aðstoðar.

Þá skrifuðu Brynjar Þór Björnsson, Darri Hilmarsson og Finnur Atli Magnússon allir undir tveggja ára samning við KR en þremeningarnir eru allir uppaldir hjá Vesturbæjarfélaginu.

Finnur Atli og Brynjar Þór hafa báðir reynt fyrir sér í Bandaríkjunum en sá síðarnefndi lék með KR-ingum í lok síðasta tímabils eftir að hafa komið aftur heim og stóð sig vel. Darri hefur hins vegar verið að vinna sig smátt og smátt upp hjá KR-ingum og er þekktur sem einn besti sjötti leikmaður deildarinnar og líklegt að honum verði ætlað enn stærra hlutverk næsta vetur.