Nordea: Flensan gæti kostað Dani 225 milljarða

Helge J. Petersen aðalhagfræðingur Nordea bankans hefur reiknað það út að flensufaraldurinn sem herjar á Danmörku gæti kostað þjóðarbúið 9 milljarða danskra kr. eða um 225 milljarða kr.

Sökum þessa mikla kostnaðar fyrir þjóðarbúið segir Helge að í framtíðinni sé mun ódýrara að bólusetja alla Dani fyrirfram þegar faraldur er í uppsiglingu en það kostar 650 milljónir danskra kr.

Útreikningar Helge gera ráð fyrir að 25-30% þjóðarinnar muni sýkjast af flensunni og missa þar með allt að fjóra daga frá vinnu. Framleiðslutapið m.v. þessar forsendur eru fyrrgreindir 9 milljarðar.

„það kostar okkur mikið fé að standa ekki fyrir bólusetningu því að veikindadagarnir sem af því hljótast með tilheyrandi framleiðslutapi kosta mun meira en bólusetning á landsvísu," segir Helge.

Hún bætir því við að fjárhagsskaðinn sé mun meiri ef tekin eru með inn í myndina forföll foreldra með veik börn heima hjá sér.