Innlent

Aldrei heyrt um neitt í líkingu við FL-styrkinn

Breki Logason skrifar
Þorgeir Baldursson
Þorgeir Baldursson
Þorgeir Baldursson fyrrverandi formaður fjármálaráðs Sjálfstæðisflokksins segist aldrei hafa heyrt um styrk sem sé eitthvað í líkingu við þær 30 milljónir króna sem flokkurinn fékk frá FL-Group árið 2006. Þorgeir segist hafa verið hættur þegar umræddur styrkur barst. Vilhjálmur Egilsson núverandi formaður fjármálaráðs segist hafa byrjað eftir að styrkurinn var veittur. Hvorugur þeirra segist vita hver gegndi stöðunni í millitíðinni en fjármálaráð sér um að afla styrkja fyrir flokkinn.

Þorgeir Baldursson forstjóri Kvosar segist hafa látið af starfi formanns fjármálaráðs áður en Andri Óttarsson tók við af Kjartani Gunnarssyni sem framkvæmdarstjóri flokksins. Hann hafi ekki vitað um umræddan styrk og hafi fyrst heyrt af honum í fréttum Stöðvar 2 í gærkvöldi.

„Ég hef aldrei heyrt neitt í líkingu við þetta og þykir í raun með ólíkindum ef rétt reynist," segir Þorgeir í samtali við fréttastofu.

Aðspurður hver hafi tekið við sem formaður fjármálaráðs eftir að hann lét af störfum segist Þorgeir ekki vera klár á því. Nýtt fólk hafi komið inn þegar nýr framkvæmdarstjóri tók við.

Andri Óttarsson tók við sem framkvæmdarstjóri flokksins 4.október árið 2006 en Kjartan Gunnarsson lét ekki af störfum strax, heldur starfaði við hlið hans þar til 1.janúar 2007.

Umræddur styrkur FL-Group barst flokknum 29.desember árið 2006, nokkrum dögum áður en lögum var breytt um hámarksframlög til stjórnmálaflokka.

Vilhjálmur Egilsson núverandi formaður fjármálaráðs flokksins segist hafa tekið við starfinu eftir áramót árið 2007. Í samtali við fréttastofu segist Vilhjálmur hafa heyrt fyrst af styrknum þegar hann las fréttir á vefnum í gærkvöldi en hann er staddur erlendis.

„Ég veit bara að menn voru í fjáröflunarátaki til þess að ná skuldunum niður á þessum tíma. Borgarstjórnarkosningarnar voru náttúrulega dýrar og svo fóru menn inn í kosningar þarna 2007, sem ég stjórnaði," segir Vilhjálmur.

Aðspurður hvort hann hafi heyrt um viðlíka upphæðir segir Vilhjálmur svo ekki vera. „Það myndi nú leysa mörg mál fyrir mig ef þetta væri hægt í dag. Núna erum við bara að reyna að ná þessum þrjú hundruð þúsund kalli."

Vilhjálmur segist ekki vita hver hafi gegnt formennsku í fjármálaráði frá því að Þorgeir hætti og hann tók við. Hann segist í raun ekki vera klár á því hvort það hafi verið einhver ákveðinn formaður. Nýtt fólk hafi komið inn með nýjum framkvæmdarstjóra, sem svo hafi hætt þegar hann tók við.

Vilhjálmur segir að Andri Óttarsson framkvæmdarstjóri flokksins sé besti maðurinn til þess að svara fyrir styrkinn.

Ekki náðist í Andra Óttarsson við vinnslu fréttarinnar.




Tengdar fréttir

Stoðir: Upplýsingar ekki frá okkur komnar

„Þessar upplýsingar eru ekki frá okkur komnar. Ég hef enga vitneskju um þetta mál og get því hvorki staðfest það né neitað,“ segir Júlíus Þorfinnsson, talsmaður Stoða, um 30 milljóna króna styrk sem FL Group greiddi til Sjálfstæðisflokksins undir lok ársins 2006.

Sigurður Líndal: Siðferðislega ámælisvert að hagnýta sér lög

„Það er siðferðislega ámælisvert að hagnýta sér lög sem maður sjálfur átti þátt í að samþykkja, þó þau hafi ekki formlega tekið gildi," segir Sigurður Líndal, lagaprófessor við frétt Stöðvar 2 þar sem sagt var frá því að FL Group styrkti Sjálfstæðisflokkinn um 30 milljónir þann 29. desember 2006, aðeins þremur dögum áður en lög um hámarksstyrki til stjórnmálaflokka tóku gildi.

Árni M: Ég hafði enga hugmynd

„Ég hafði enga hugmynd. Ég heyrði þetta bara fyrst í fréttunum áðan," sagði fyrrum fjármálaráðherra Sjálfstæðisflokksins, Árni M. Mathíesen, spurður hvort hann hefði heyrt af risaháum styrk FL Group til Sjálfstæðisflokksins í lok desember árið 2006, aðeins þremur dögum áður en lögin tóku gildi um hámarksstyrk fyrirtækja til stjórnmálaflokka.

Björn Bjarnason: Hefði aftekið þessa ráðstöfun fjár með öllu

„Ég vissi þetta ekki og hefði aftekið þessa ráðstöfun fjár með öllu hefði ég haft pata af henni og séð þetta rétt," segir Björn Bjarnason þingmaður Sjálfstæðisflokksins spurður út í þrjátíu milljón króna fjárstyrk FL Group til Sjálfstæðisflokksins. Flokkurinn veitti styrknum viðtöku þann 29. desember árið 2006, aðeins tveimur dögum áður en lög um hámarkstyrki til stjórnmálaflokka tóku gildi.

Samfylkingin ber við trúnaði og neitar að gefa upp helstu styrktaraðila

Framkvæmdastjóri Samfylkingarinnar neitar að gefa upp hverjir voru helstu styrktaraðilar flokksins á árinu 2006. Sýna þurfi styrkjendum trúnað. Framlag FL Group til Sjálfstæðisflokksins undir lok þess árs, nam ríflega helmingi af samanlögðum framlögum lögaðila til flokksins árið eftir.

FL Group styrkti ekki Sjálfstæðisflokkinn ári eftir risastyrk

FL Group styrkti ekki Sjálfstæðisflokkinn árið 2007. Fram kom í fréttum okkar í gærkvöld að félagið lagði þrjátíu milljónir inn á reikning flokksins í lok árs 2006. Frjálsyndi flokkurinn fékk heldur ekki styrk frá FL Group árið 2007.

FL Group styrkti Sjálfstæðisflokk um þrjátíu milljónir

FL Group styrkti Sjálfstæðisflokkinn um þrjátíu milljónir króna aðeins nokkrum dögum áður en lögum var breytt um hámarksframlög til stjórnmálaflokka. Skattrannsóknarstjóri hefur reikning um þennan styrk meðal annars til rannsóknar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.