Kröfuhafar samþykktu nauðasamninga

Allir kröfuhafar Eimskips greiddu atkvæði með nauðasamningafrumvarpi félagsins en atkvæði voru greidd á kröfuhafafundi félagsins í dag. Í tilkynningu frá Eimskip kemur fram að félagið muni nú leggja fram skriflega kröfu um staðfestingu nauðasamnings fyrir héraðsdómara í næstu viku.

„Fjárhagsleg endurskipulagning Eimskips er búin að standa yfir í allmarga mánuði. Nú er stærsta áfanganum náð sem var að skapa Eimskip eðlileg rekstrarskilyrði og leggja grunn að framtíð félagsins. Stjórn og starfsmenn félagsins eru þakklátir kröfuhöfum fyrir stuðning við félagið á erfiðum tímum. Ég vil þakka starfsmönnum og viðskiptavinum félagsins fyrir stuðning og velvilja í garð þess á meðan á þessu ferli stóð. Án þeirra stuðnings hefði róðurinn verið vonlaus," segir Gylfi Sigfússon, forstjóri Hf. Eimskipafélags Íslands, í tilkynningu vegna málsins.

Gylfi segir að flutningastarfsemi félagsins sé nú tryggð svo og störf um 1.500 starfsmanna. Mikilvægt sé á þessum tímamótum fyrir íslenskt atvinnulíf að öll hjól þess fari nú að snúast á fullum afköstum. Með þessum áfanga sé Eimskip að varða leiðina að endurreisn íslenskra fyrirtækja þjóðinni til heilla.