Mikil hækkun á vísitölu framleiðsluverðs

Vísitala framleiðsluverðs í apríl 2009 var 164,1 stig og hækkaði um 7,2% frá mars 2009.

Þetta kemur fram á vefsíðu Hagstofunnar. Þar segir að vísitala framleiðsluverðs fyrir sjávarafurðir var 208,4 stig, sem er hækkun um 11,4% (vísitöluáhrif 3,7%) frá fyrri mánuði og vísitala fyrir stóriðju var 156,9 stig, hækkaði um 10,2% (3,1%). Vísitalan fyrir matvæli hækkaði um 0,3% frá mars og vísitala fyrir annan iðnað hækkaði um 1,8% (0,4%).

Vísitala framleiðsluverðs fyrir vörur sem framleiddar voru og seldar innanlands lækkaði um 0,2% (-0,1%) milli mánaða en vísitala fyrir útfluttar afurðir hækkaði um 10,7% (7,3%).

Frá apríl 2008 hefur vísitala framleiðsluverðs hækkað um 12,5% og verðvísitala sjávarafurða um 28,6%. Á sama hefur verð á afurðum stóriðju lækkað um 16,5% en matvælaverð hefur hækkað um 14,8%.