Framtíð Beckham ræðst væntanlega fyrir helgi

Adriano Galliani varaforseti AC Milan segist reikna með því að niðurstaða fáist í máli David Beckham fyrir helgina.

Beckham á að snúa aftur til LA Galaxy eftir nokkrar vikur þegar lánssamningi hans við AC Milan lýkur, en hann virðist tilbúinn að tjalda öllu til að vera áfram á Ítalíu.

Forráðamenn Galaxy neituðu fyrsta tilboði Milan í Beckham fyrir síðustu helgi og sagt er að það hafi verið langt frá því sem Bandaríkjamennirnir sætta sig við.

Því hefur verið fleygt að Beckham gæti jafnvel verið tilbúinn að kaupa sig út úr samningi sínum við Galaxy, en það myndi þýða að hann gæfi frá sér gríðarlegar fjárhæðir sem hann á inni af samningi sínum í Los Angeles.

"Það er enn nokkuð bil milli samningsaðila og við verðum að bíða og sjá. Leikmaðurinn vill vera hér og föstudagurinn gæti ráðið miklu um framhaldið," sagði Galliani í samtali við La Repubblica.