Fjárfestir fær 2,5 milljarða uppgjör frá Kaupþingi

Norski fjárfestirinn Christian Sveaas bíður nú eftir að 139 milljónir norskra kr. eða um 2,5 milljarðar kr. rúlli inn á reikning sinn frá Kaupþingi. Bankinn hefur samykkt að greiða þessa upphæð til Sveaas en hún fraus inni í Kaupþingi þegar bankinn hrundi s.l. haust.

Samkvæmt reglum bankatryggingarsjóðsins hérlendis voru innistæður sem þessar aðeins tryggðar upp að 2 milljónum norskra kr. eða 36 milljónum kr. og fær því Sveaas umtalsverða fjárhæð umfram trygginguna.

Samkvæmt umfjöllun í Finansavisen hefur skilanefnd Kaupþings sent norska fjármálaeftirlitinu skýrslu þar sem segir m.a. að þessar 139 milljónir norskra kr. sem Sveaas átti inni hjá Kaupþingi í fyrra var innlögn í dollurum á reikning hans frá norskum viðskiptavini Kaupþings sem var með stórar lánaskuldabindingar á Íslandi. Segir að málið verði leyst í samvinnu Sveaas og skilanefndarinnar.

Sveaas segir í tölvupósti við Finansavisen að Kistefor AS (fjárfestingarfélag Sveaas, innsk. blm) eigi 20 milljón dollara inni í Kaupþingi. „Að öðru leyti hef ég ekkert að segja og góða helgi í snjókomunni," segir í póstinum.

Fram kemur að Sveaas skuldaði einnig Kaupþingi meir en 20 milljónir dollara á þeim tímapunkti sem fyrrgreind upphæð kom inn á reikning hans. Finansavisen segir að Kistefor geti skuldajafnað þeirri upphæð á móti því sem hann fær frá skilanefndinni.

Sveaas er meðal þekktari fjárfesta í Noregi og hefur setið í stjórnum margra stórfyrirtækja þar, m.a. Orkla Group og Stolt-Nielsen. Þá er hann meðlimur Deans Council við stjórnunarskóla John F. Kennedy í Harvard háskólanum.