Mesta lækkun íbúðaverðs milli mánaða síðan 1994

Íbúðaverð á höfuðborgarsvæðinu lækkaði um 3,8% milli febrúar og mars samkvæmt upplýsingum sem Fasteignaskrá Íslands hefur birt. Þetta er mesta lækkun á milli mánaða sem orðið hefur á vísitölu húsnæðisverðs á höfuðborgarsvæðinu síðan byrjað var að reikna vísitöluna árið 1994.

Greining Íslandsbanka fjallar um málið í Morgunkorni sínu. Þar segir að húsnæðisverð hefur nú lækkað samfellt undanfarna átta mánuði um samtals 8,1%. Frá því að húsnæðisverð á höfuðborgarsvæðinu náði toppi haustið 2007 hefur það lækkað um 10% að nafnvirði og 28% að raunvirði.

Greiningin segir að í ljósi þeirra efnahagsaðstæðna sem nú ríkja í hagkerfinu kemur það ekki á óvart að húsnæðisverð sé nú farið að gefa verulega eftir. Í fyrsta lagi er hagkerfið að koma út úr uppsveiflu sem var að hluta til drifin áfram að miklum verðhækkunum á íbúðaverði. Á þriggja ára tímabili frá 2004 til 2007 hækkaði íbúðaverð á höfuðborgarsvæðinu um 70% að nafnverði.

Að hluta var hér um verðbólu að ræða sem var byggð á óraunhæfum væntingum og átti sér þannig engar efnahagslegar stoðir.

Í öðru lagi hefur hin mikla uppsveifla undanfarinna ára á íbúðamarkaði orðið til þess að nú þegar frost er á þessum markaði situr eftir mikill fjöldi nýrra óseldra íbúða á framboðshlið markaðarins og skapa þrýsting til verðlækkunar.

Í þriðja lagi hefur eftirspurnarhliðin á íbúðamarkaði tekið miklum breytingum undanfarið en kaupmáttur launa hefur dregist hratt saman undanfarið með hratt vaxandi atvinnuleysi, aukinni verðbólgu og lækkun gengis krónunnar svo eitthvað sé nefnt. Væntingar um frekari verðlækkun húsnæðis dregur úr spurn eftir íbúðarhúsnæði og sérstaklega eftir stærri eignum.