Milljarða lán Milestone til Wernersbræðra einskis virði

Sex milljarða króna lán Milestone til Karls og Steingríms Wernerssona, fyrrverandi eigenda félagsins, er einskis virði í bókum þess. Lánið var veitt til félags í eigu bræðranna og var meðal annars notað til að kaupa systur þeirra út úr Milestone.

Milestone ehf var í dag úrskurðað gjaldþrota en stjórn félagsins hafði farið fram á það eftir að kröfuhafar höfnuðu nauðasamningi fyrr í vikunni. Milestone er í eigu Karls og Steingríms Wernerssona. Kröfur í búið nema tæplega 90 milljörðum króna og var Glitnir langstærsti kröfuhafinn með 41,6 milljarða króna kröfu. Þá gerðu sex lífeyrissjóðir kröfur í búið, upp á alls 1,7 milljarð íslenskra króna. Í nauðasamningunum var áætlað virði eigna Milestone um 5,5 milljarðar.

Ekki voru þó allar kröfur sem Milestone átti í samningstilboðinu. Þær kröfur sem litlar sem engar líkur voru á að fengist eitthvað upp í var sleppt. Þeirra á meðal 6,1 milljarða króna krafa á Milestone Limited. Það félag er einnig í eigu Karls og Steingríms. Árið 2007 fengu þeir bræður meðal annars tveggja og hálfs milljarða króna lán hjá Milestone í gegnum Milestone Limited til að kaupa systur sína út úr félaginu.

Krafan hefur þó ekki verið afskrifuð en í bókum Milestone er hún einskis virði. Samkvæmt heimildum fréttastofu ríkti mikil reiði á meðal kröfuhafa vegna milljarða lánveitinga til Wernersbræðra sem ekki fást til baka.