Íslandssjóðir stofna nýjan verðbréfasjóð

Íslandssjóðir hafa sett nýjan verðbréfasjóð á markað, Veltusafn, sem hentar vel til sparnaðar í skemmri tíma. Markmið sjóðsins er að nýta tækifæri á markaði með virkri stýringu innlána, víxla og ríkisskuldabréfa en á sama tíma að skila jafnri og stöðugri ávöxtun.

Í desember 2008 settu Íslandssjóðir Ríkissafnið á markað og hefur sjóðnum verið mjög vel tekið af fjárfestum en í dag hafa um 1.400 aðilar fjárfest í honum fyrir 14,5 milljarða króna. Veltusafnið byggir á sömu aðferðafræði og Ríkissafnið, það er blöndun ríkisbréfa og innlána fjármálastofnana. Meginmunurinn á milli sjóðanna felst í styttri meðallíftíma eigna Veltusafnsins, það er 1 mánuður til 1 ár miðað við 1-3 ár í Ríkissafninu.

„Virk stýring í Veltusafninu gerir það einnig að verkum að mögulegt er að nýta tækifæri á markaði til að ná fram betri ávöxtun til lengri tíma miðað við sparnaðarreikninga. Með fjárfestingu í sjóðnum næst góð eignadreifing milli skuldabréfa með ábyrgð ríkissjóðs og innlána fjármálastofnana," segir í tilkynningunni.