Norskur fjárfestir kaupir hlut í MP Banka

Norski fjárfestirinn Endre Røsjø og MP Banki hf. hafa náð samkomulagi um að Røsjø eignist hlut í bankanum að loknum fyrirhuguðum hluthafafundi í næsta mánuði og verði þar með virkur hluthafi við framtíðarþróun bankans.

Endre Røsjø á að baki langan og farsælan feril í banka- og fjárfestingastarfsemi, allt frá árinu 1970. Á meðal núverandi fjárfestinga hans er norska fjárfestingafélagið Centennial og verðbréfafyrirtækið Pinemont Securities í London sem er aðili að kauphöllinni þar. Á meðal fyrri fjárfestinga Røsjø er Pinemont Bank í Texas í Bandaríkjunum sem hann seldi fyrir nokkrum árum.

Gunnar Karl Guðmundsson, forstjóri MP Banka, er mjög ánægður með fjárfestingu Røsjø. „MP Banki er vel í stakk búinn til að styrkja stöðu sína á markaðnum, en bankarekstur er krefjandi verkefni við núverandi aðstæður á Íslandi. Það er mjög jákvætt fyrir okkur að jafnreyndur fjármálamaður og Røsjø gangi til liðs við bankann. Honum líst mjög vel á rekstrarhorfur bankans og aðkoma hans eykur möguleika bankans til að nýta tækifærin og takast á við ný verkefni."

Margeir Pétursson, stjórnarformaður MP Banka, er einnig mjög ánægður með ákvörðun Røsjø. „Stjórn MP Banka og stærstu hluthafar átta sig vel á því að ef MP Banki vill verða í leiðandi stöðu á markaðnum þá þarf bankinn að vera í dreifðara eignarhaldi. Fjárfesting Endre Røsjø er fyrsta skrefið í þá átt og við erum að vinna að því að fá fleiri stofnanafjárfesta að bankanum."

Endre Røsjø telur fjárfestingu sína í íslenskum banka fela í sér mikil tækifæri og vonast til að koma að fleiri verkefnum á Íslandi á næstunni, m.a. í gegnum norrænan fjárfestingasjóð. „MP Banki var eins og ég sjálfur mjög áhættufælinn á árunum 2007-8 og lagði áherslu á ríkisskuldabréf. Hrunið var mikil þolraun fyrir fjármálafyrirtæki eins og MP Banka og forysta hans og starfsfólk hafa sannað að þau eru þrautseig og traust. Mér líst vel á að þróa bankann áfram með þeim. Ég heimsótti Ísland í vor að frumkvæði fyrrum Seðlabankastjóra, Svein Harald Øygard, til að kanna hvort ég og aðrir norrænir fjárfestar gætum fjárfest hér og með því örvað efnahagslífið. Ég væri mjög ánægður ef þessi fyrsta fjárfesting mín gæti eflt traust á íslenska bankakerfinu."

Þetta kemur fram í tilkynningu frá MP banka.