Lánadrottnar Kaupþings í Lúx samþykkja endurskipulagningu

Helstu lánadrottnar Kaupthing bank í Lúxemborg samþykktu í dag nýja áætlun um endurskipulagningu bankans sem unnin var í samráði við Blackfish Capital Management Limited sem er fjármálafyrirtæki í eigu Rowland fjölskyldunnar í Bretlandi. Samþykktu lánardrottnar sem eiga 98% af útistandandi kröfum samkomulagið og hins vegar 23 af þeim 25 bönkum um ræðir. Í báðum tilvikum þurfti samþykki meirihluta til að samkomulagið öðlaðist gildi.

Þetta kemur fram í tilkynningu frá bankanum. Þá segir að Rowland fjölskyldan hafi verið viðloðandi fjárfestingar og fjármálaumsýslu frá því um 1960 og reki skrifstofur í London og á Guernsey. Tilgangur fjölskyldunnar með yfirtöku á bankanum sé að bjóða hefðbundna bankastarfsemi á sviði eignastýringar og einkabanka-þjónustu meðal annars til íslenskra viðskiptavina.

„Með ofangreindu samþykki er ljóst að allir viðskiptavinir Kaupthing Bank Luxembourg í Belgíu, Sviss, Lúxemborg, um 23 þúsund viðskiptavinir fá innstæður sínar að fullu greiddar. Íslenska ríkið tekur ekki á sig neinar skuldbindingar né leggur til neina fjármuni vegna endurskipulagningar bankans. Eins og áður hefur verið greint frá þá er tryggt við endurskipulagningu bankans að aðgangur íslenskra stjórnvalda að upplýsingum er varðar einstaka viðskiptavini, verði hinn sami og áður.

Eins og kunnugt er þá óskaði Kaupthing Bank Luxembourg S.A. eftir greiðslustöðvun þann 9. október sl. en síðan þá hafa yfirvöld í Lúxemborg, þarlendir umsjónarmenn greiðslustöðvunarinnar ásamt framkvæmdastjórn bankans og skilanefnd Kaupþings hf. unnið að endurskipulagningu bankans til að tryggja eignir viðskiptavina. Þessu markmiði hefur nú verið náð með samþykki kröfuhafanna sem nú liggur fyrir. Nýjir eigendur stefna að því að opna bankann undir nýju nafni í byrjun júlí en tíminn þangað til verður nýttur til að undirbúa formlega opnun hins nýja banka."