Samkeppniseftirlitið skoðar mál Tals

Samkeppniseftirlitið hefur til skoðunar deilur vegna reksturs símafyrirtækisins Tals og hefur sent forsvarsmönnum Teymis, stærsta eigenda Tals og símafyritækisins Vofafone, fyrirspurn vegna þess.

Um miðjan desember gerði Tal samning um aðgang að dreifikerfi Símans sem átti að taka gildi frá áramótum. Áður hafði Tal haft samning við Vodafone um aðgang að dreifikerfi þess en jafnframt verið með reikisamning við Símann með milligöngu Vodafone.

Þann 26. desember rifti Teymi samningnum við Símann og var forstjóra Tals sagt upp störfum. Jóhann Óli Guðmundsson, sem fer með 49 prósenta hlut í Tali á móti 51 prósents hlut Teymis, er afar ósáttur við vinnubrögð meirihluta stjórnar Tals. Í yfirlýsingu sem hann sendi frá sér á gamlársdag sagði hann ákvörðunina ólögmæta. Jóhann Óli fullyrti ennfremur að fyrir fulltrúum Teymis hafi fyrst og fremst vakað að gæta hagsmuna Vodafone frekar en hluthafa og viðskiptavina Tals. Slíkt hlyti að koma til skoðunar samkeppnisyfirvalda.

Páll Gunnar Pálsson, forstjóri Samkeppniseftirlitsins, segir í samtali við Vísi að Samkeppniseftirlitið hafi haft málið til skoðunar og hafi sent fyrirspurn til forsvarsmanna Teymis vegna þess.