Íhuga að stefna Logos

AB Capital, fyrirtæki Róberts Wessmanns og Björgólfs Thors Björgólfssonar, íhugar að setja fram hundruð milljóna króna skaðabótakröfu á hendur lögmannsstofunni LOGOS, sem meðal annars sér um þrotabú Baugs. Þetta er vegna meints klúðurs við landakaup á Spáni 2005.

Það var í miðju góðærinu, árið 2005 að útrásarvíkingarnir Björgólfur Thor Björgófsson og Róbert Wessmann, stofnuðu félag um landakaup á Spáni. Til stóð að gera þar mikla paradís fyrir ferðamenn, með golfvöllum og sundlaugum og fleiru og kostuðu herlegheitin átta milljarða á gengi þess tíma.

Lögmannsstofan Logos var fengin til að annast áreiðanleikakönnun vegna landakaupanna.

Árni Harðarson, forstjóri Salt Investments, félags Róberts, sem á meirihluta í AB Capital, staðfesti í samtali við fréttastofu að félagið íhugaði að höfða skaðabótamál gegn LOGOS vegna hundruð milljóna króna tjóns. Hann sagði það ekkert leyndarmál að það væri þeirra mat að áreiðanleikakönnunin hefði verið illa unnin af hálfu stofunnar.

Forsvarsmenn Logos segja þetta gamla umræðu, sem þeir hafi talið að væri lokið. Þeir hafi ekki ástæðu til að ætla annað en að svo sé.

Þegar lögmannstofan var ráðin til verksins var hún í sameign helstu eigenda, sem jafnframt þýðir að þeir báru sameiginlega persónulega ábyrgð á fjárreiðum lögmannastofunnar. Logos hefur séð um ýmis gjaldþrotamál, til að mynda er skiptastjóri Baugs hjá stofunni.

Landakaupin hjá þeim útrásarfélögum á La Manga hafa verið hálfgerð sorgarsaga. Nú rúmum fjórum árum eftir kaupin hefur ekkert gerst. Helsta ástæðan fyrir því er sú að skömmu eftir að landakaupin gengu í gegn var nokkrum bæjarstjórum innan héraðsins Murcia sem La Manga tilheyrir stungið í steininn vegna mútumála auk þess sem hluti af landinu var friðlýstur af sjálfum spænska kónginum.