Skráning Össur hf. í Kaupmannahöfn var samþykkt

Umsókn Össurar hf. um skráningu hlutabréfa félagsins í kauphöllina í Kaupmannahöfn hefur verið samþykkt. Hlutabréf Össurar verða opinberlega skráð og tekin til viðskipta 4. september 2009. Hlutabréf Össurar munu áfram vera skráð í kauphöllina á Íslandi.

Í tilkynningu segir að útgefið hlutafé Össurar er 423 milljónir kr. og skiptist í jafnmarga hluti að nafnvirði ein króna hver. Allir hlutirnir eru í sama hlutaflokki og þeim fylgja sömu réttindi.

Nordea Bank Danmark A/S er umsjónaraðili með bréfum Össurar sem verða skráð hjá VP Securities A/S í Danmörku. Össur hefur jafnframt gert samning um viðskiptavakt við Nordea Markets (deild innan Nordea Bank Danmark A/S).

Í tengslum við skráninguna hefur Össur gefið út ágrip, samþykkt af danska fjármálaeftirlitinu, þar sem er að finna helstu upplýsingar um félagið og þá áhættu sem tengist starfsemi þess og hlutabréfum.