Íslendingar treysta RÚV best

Um 75% aðspurðra segjast bera mikið traust til fréttastofu RÚV. Þetta eru ríflega tvöfalt fleiri en segjast bera mikið traust til fréttastofu Stöðvar 2 (37,2%). Þetta kemur fram í könnun MMR sem birtist í dag.

Morgunblaðið er enn sem fyrr það dagblað sem nýtur mests trausts meðal svarenda, en 57,9% þeirra segjast nú bera mikið traust til blaðsins.

Fréttablaðið nýtur mikils trausts meðal 38,1% svarenda. Meðal netfréttamiðla nýtur Mbl.is mests trausts, en 59,6% segjast bera mikið traust til Mbl.is, sem eru 32,7 prósentustigum fleiri en þeir sem segjast bera mikið traust til Visir.is (26,9%).

Í könnuninni kom í ljós að 18,9% segjast bera mikið traust til fjölmiðlanna almennt.

Þetta eru heldur fleiri en sögðust bera mikið traust til fjölmiðlanna í könnun sama efnis í maí 2009 þegar 14,9% sögðust bera mikið traust til fjölmiðlanna.

Á sama tímabili hefur fjöldi þeirra sem segist bera lítið traust til fjölmiðlanna fækkað úr 44,1% í 35,8.

Könnunin var framkvæmd 9.-14. september. Svarfjöldi voru 909 einstaklingar. Þar af tóku 97,4% afstöðu.