Jón fær framvegis 1,5 milljónir í laun hjá Stoðum

Framkvæmdastjóri Stoða, Jón Sigurðsson, verður með 1,5 milljónir í laun hjá félaginu. Í Fréttablaðinu í dag er sagt frá því á forsíðu að Jón sé enn á ofurlaunum hjá félaginu þrátt fyrir að félagið hafi gengið í gegnum nauðasamninga.

Eiríkur Elís Þorláksson stjórnarformaður Stoða vildi ekki tjá sig um laun Jóns við Fréttablaðið í gær en nú hefur hann sent frá sér tilkynningu þar sem fram kemur að Jón hafi síðustu misserin starfað samkvæmt ráðningarsamningi og hafi hann verið með um fimm milljónir króna í laun á mánuði.

Nauðasamningar Stoða voru samþykktir fyrr í sumar og segir Eiríkur að þá hafi verið ljóst að starfsemin myndi halda áfram. „Samkomulag hefur nú verið gert við framkvæmdastjóra félagsins sem felur í sér yfir 70% lækkun á launum hans," segir í tilkynningunni frá Eiríki um leið og hann áréttar að Stoðir séu ekki í meirihlutaeigu ríkisfyrirtækja eins og haldið er fram í frétt Fréttablaðsins.

Því má gera ráð fyrir því að Jón verði framvegis með um 1,5 milljónir króna í laun hjá Stoðum framvegis. Ekki náðist í Eirík Elís en Júlíus Þorfinnsson verkefnastjóri hjá Stoðum sagðist í samtali við Vísi í dag ekki geta sagt til um hvenær samkomulagið um launalækkunina hafi verið gert. Að því hafi hins vegar verið unnið allt frá því nauðasamningarnir voru samþykktir.