Góðar líkur á besta þjónustujöfnuði síðan 1990

„Af þróun kortaveltunnar má þannig ráða að talsverður afgangur muni reynast af þjónustujöfnuði á þriðja fjórðungi ársins, og teljum við ekki úr vegi að ætla að hann gæti orðið á bilinu 12-18 milljarðar kr. Ef grunur okkar reynist réttur verður afgangurinn á þriðja ársfjórðungi sá mesti síðan Seðlabankinn hóf að taka saman ársfjórðungslegar greiðslujafnaðartölur árið 1990."

Þetta segir í Morgunkorni greiningar Íslandsbanka. Þar segir ennfremur að þessi afgangur hefur töluverða þýðingu fyrir gengi krónu, því færa má fyrir því rök að afgangur af þjónustujöfnuði skili sér mun greiðlegar inn á gjaldeyrismarkað en samsvarandi afgangur af vöruskiptum við útlönd.

Heldur virðist tekið að draga úr samdrætti einkaneyslu á ársgrundvelli, enda voru heimilin þegar farin að draga töluvert úr neyslu sinni á seinni hluta síðasta árs. Nýbirtar tölur Seðlabankans um greiðslumiðlun eru til marks um þetta. Samkvæmt þeim nam kreditkortavelta í september 25,9 milljörðum kr. og hefur ekki verið meiri að nafnvirði frá sama mánuði í fyrra.

Sé veltan hins vegar staðfærð með vísitölu neysluverðs og gengisvísitölu kemur upp úr dúrnum að hún var ríflega 18% minni að raunvirði í september en á sama tíma í fyrra. Samdrátturinn er sér í lagi mikill í erlendri kortaveltu, sem dróst saman að raunvirði um tæp 40% á milli ára, á meðan raunlækkun innlendrar kortaveltu var 12,5% á sama tíma.

Auk vísbendinga um einkaneyslu má úr tölum Seðlabankans um greiðslumiðlun fá nasasjón af þróun þjónustujafnaðar, enda birtir bankinn tölur yfir notkun erlendra greiðslukorta hér á landi, ekki síður en kortanotkun Íslendinga erlendis.