Rússneskur auðmaður í tugmilljarða skilnaði

Rússneski auðmaðurinn Boris Berezovsky stendur nú í skilnaðarmáli við eiginkonu sína Galinu þótt að þau hafi ekki búið saman í 10 ár. Galina gæti fengið allt að 100 milljónir punda, eða ríflega 20 milljarða kr., út úr skilnaðinum við Berezovsky.

Samkvæmt frétt um málið í blaðinu Independent var Berezovsky fátækur rússneskur stærðfræðingur með mánaðarlaun upp á ca. 12.000 kr. þegar hann kynntist Galinu árið 1981 og þau giftu sig. Í dag er hann margfaldur milljarðamæringur.

Auðæfi Berezovsky eru tilkomin vegna tengsla sinna við fjölskyldu Boris Jeltsin fyrrum Rússlandsforseta. Berezovsky var í innsta hring valdaklíkunnar í kringum Jeltsin og nýtti sér það óspart til að skara eld að eigin köku þegar opinberar eignir í Rússlandi voru einkavæddar. Meðal annars eignaðist Berezovsky verðmæta hluti í Aeroflot flugfélaginu og ýmsum olíufélögum.

Berezovsky studdi Putin árið 2000 en síðan slettist upp á vinskap þeirra þegar Putin losaði sig við öll tengsl við þá rússnesku auðmenn sem nýtt höfðu sér Jeltsin á sínum tíma.

Eftir það flutti Berezovsky til Bretlands og fékk þar hæli sem pólitískur flóttamaður árið 2003. Rússnesk yfirvöld hafa lengi reynt að fá hann framseldan vegna ásakana um spillingu og fjárdrátt.

Galina býr í London þótt þau hafi ekki búið saman í áratug en hún á tvö börn með Berezovsky. Hún hefur nú sótt opinberlega um skilnað.