Danir geta tekið út séreignasparnað sinn í júní

Danskir launþegar geta tekið út séreignasparnað sinn frá 1. júní í ár og fram til áramóta þrátt fyrir að hafa ekki náð 65 ára aldri. Þetta hefur danska stjórnin ákveðið.

Í frétt um málið í Jyllands Posten segir að Danir eigi nú 50 milljarða danskra kr. í séreignasparnaði eða um 960 milljarða kr.. Samkvæmt ákvörðun stjórnvalda verða þeim sem ætla að taka sparnað sinn út að greiða 35% skatt af fyrstu 15.000 dkr. og síðan 50% skatt af upphæðum sem eru umfram þá tölu.

Lars Lökke Rasmussen fjármálaráðherra segir í samtali við blaðið að almennt liggi séreignasparnaður hins almenna Dana á bilinu 15.000 til 30.000 dkr. eða allt að tæplega 600.000 kr.. Lars Lökke segist ekki geta sagt til um hve margir Danir muni nýta sér þetta „tilboð" stjórnvalda.

Fram kemur í samtalinu við Lars Lökke að ákvörðunin er m.a. tekin til þess að þær fjölskyldur sem eiga í fjárhagserfiðleikum geti nú haft meira fé milli handanna og þar af leiðandi aukið neyslu sína sem aftur hjálpar til við að halda atvinnulífinu gangandi.