Vöruskiptin hagstæð um 12.6 milljarða í ágúst

Samkvæmt bráðabirgðatölum fyrir ágúst 2009 nam útflutningur 44,1 milljarði króna og innflutningur 31,5 milljörðum króna. Vöruskiptin í ágúst voru því hagstæð um 12,6 milljarða króna samkvæmt bráðabirgðatölum.

Þetta kemur fram á vefsíðu Hagstofunnar. Þar segir að vísbendingar eru um meira verðmæti útfluttra sjávarafurða og iðnaðarvara og minna verðmæti innflutts eldneytis í ágúst 2009 miðað við júlí 2009.

Í ljós hefur komið að skil á tollskýrslum hefur verið ábótavant fyrir innflutning á hrá- og rekstrarvörum á fyrri mánuðum þessa árs. Því þarf að leiðrétta innflutningstölur fyrri mánuði ársins.

Leiðréttar tölur verða gefnar út með útgáfu talna um vöruskiptin janúar-ágúst í lok þessa mánaðar. Fyrstu niðurstöður benda til að afgangur á vöruskiptajöfnuði í janúar-júlí sé af þessum sökum ofmetinn um tæplega 8 milljarða kr.