Hluthafar Rio Tinto í uppreisn vegna Kínasamnings

Stór hópur hluthafa í Rio Tinto segjast ætla að greiða atkvæði gegn samningi félagsins við kínverska ríkisálfélagið Chinalco. Segja þeir að Kínverjarnir fái of mikið fyrir of lítið með samningnum en með honum koma tæplega 20 milljarðar dollara í nýju hlutfé inn í Rio Tinto.

Í umfjöllun um málið í Guardian segir að orðstír forstjóra og stjórnarformanns Rio Tinto, þeirra Tom Albanese og Paul Skinner, sé lagður undir í samningnum. Hluthafarnir hefðu viljað að félagið færi í hlutafjáraukningum meðal þeirra í stað þess að leita til Kínverjanna.

Rio Tinto, sem m.a. á álverið í Straumsvík, á í miklum lausafjárvandræðum og var samningnum við Chinalco ætlað að bjarga þeirri stöðu. Rio Tinto þarf að greiða skuldir upp á 20 milljarða dollara á næstu tveimur árum og er fyrsta greiðslan, upp á 8,9 milljarða dollara, á gjalddaga í október.

Samkvæmt Guardian er það breska félagið Legal & General sem skipuleggur uppreisn hluthafanna gegn Chinalco samningnum en félagið á 5% hlut í Rio Tinto.

Helsta áhyggjumál óánægðra hluthafa er að Chinalco muni nota áhrif sín innan Rio Tinto til að fá ódýrari hrávörur frá Rio en Kínverjar eru stærstu viðskiptavinir Rio Tinto.