WTM: Aukin bjartsýni og meiri áhugi á ferðum til Íslands

Viðmælendur fulltrúa Ferðamálastofu voru sammála um að það gætti heldur meiri bjartsýni um næsta ár samanborið við raunniðurstöðu þessa árs á hinni árlegu ferðasýningu World Travel Market (WTM)í London sem lauk í gær. Hún er ein stærsta ferðasýning í heimi.

Þetta kemur fram á vefsíðu Ferðamálastofu þar sem fjallað er um sýninguna. Þar segir að vel tókst til að vanda og íslensku fyrirtækin fundu fyrir enn meiri áhuga en síðasta ár á ferðum til landsins.

Sem fyrr sá Ferðamálastofa um undirbúning og skipulagningu fyrir Íslands hönd en íslensku þátttakendurnir voru 14 talsins. Líkt og fyrri ár var sýningarsvæðið sett upp í samstarfi við frændur okkar á Norðurlöndunum.

Fulltrúar Ferðamálastofu á básnum voru Jón Gunnar Borgþórsson, forstöðumaður markaðssviðs, Sigríður Gróa Þórarinsdóttir, markaðsfulltrúi fyrir Bretland og einnig aðstoðaði Clair Horwood hjá almannatengslafyrirtækinu Saltmarsh að hluta. Að dómi þátttakenda tókst framkvæmdin mjög vel.

WTM er mikil að vöxtum en hún er haldin í glæsilegri sýningahöll, ExCel í Docklands, austast í London. Sýningarbásarnir eru um 700 talsins og þarna koma saman um 4.900 sýnendur frá öllum heimshornum. Sýningin stendur yfir í fjóra daga. Fyrstu sýningardagana er einungis fagaðilum í viðskiptaerindum veittur aðgangur en seinni dagana er einnig opið fyrir almenning.