Gengi Buttons hefur hríðfallið

Bretinn Jenson Button hefur ekki komist á verðlaunapall í fimm síðustu Formúlu 1 mótum og féll úr leik á sunnudaginn, þegar ekið var aftan á hann. Hann vann fyrstu sex mót ársins og er enn fyrstur í stigamótinu þrátt fyri slakt gengi að undanförnu.

Segja má að lánið hafi leikið við hann, þar sem keppinautum hans hefur ekki gengið sérlega vel að undanförnu. Button er með forystu í stigamóti ökumanna þegar fimm mót eru eftir. Button er með 16 stig á Rubens Barrichello og 19 á Sebastian Vettel og Brawn liðið er enn með forystu í stigamóti bílasmiða.

"Barrichello hefur sótt 10 stig á Button í síðustu tveimur mótum og Vettel 6 og honum hefur ekki gengið vel síðustu mánuði. Hann hefur ekki efni á þessum ógöngum lengur og það eru fjórir kappar að keppa um titilinn, Mark Webber á líka sjéns. Það er allt galopið", sagði Christian Horner stjóri Red Bull liðsins.

"Báðir ökumenn okkar geta náð framúr Button að stigum og við höfum ekki gefið þeim neinar liðsskipanir. Það munar ekki nema 1.5 stigi á þeim og þeim er frjálst að keppa af hörku við Button og Barrichello."

Þau mót sem eru eftir eru Monza á Ítalíu, götumótið í Singapúr, Suzuka í Japan, Interlagos í Brasilíu og nýtt mót í Abu Dhabi.

Sjá brautarlýsingar.