Svikamylla Madoff var afhjúpuð fyrir áratug síðan

Svikamylla Bernhard Madoff var afhjúpuð fyrir áratug síðan eða 1999 en samt fékk spilaborgin að standa uppi næstu tíu árin með tapi upp á fleiri tugi milljarða dollara fyrir fórnarlömb Madoff.

Greint er frá þessu í grein í blaði sambands danskra fjárfesta, Aktionæren. Þar segir að árið 1999 hafi fjárfestir, sem hafði áhuga á að setja peninga sína í ávöxtun hjá Madoff, haft samband við greiningarfyrirtækið Northfield Information Services. Bað hann Northfield að gera fyrir sig úttekt á starfsháttum Madoff og því hvernig honum tækist að ná svo mikilli ávöxtun úr fjárfestingum sínum eins og raun bar vitni.

Dan diBartolomeo forstjóri Northfield Information Services segir að úttekt þeirra hafi leitt í ljós að það hafi verið ómögulegt fyrir Madoff að ná þessari ávöxtun sinni án þess að einhver maðkur væri í mysunni. „Miðað við þá verðbréfapappíra sem Madoff sagðist versla með var ekki hægt að ná þessari ávöxtun fram á löglegan hátt," segir diBartolomeo.

Fram kemur í greininni að það hafi aðeins tekið 3 til fjóra klukkutíma fyrir Northfield Information Services að komast að því að um svikamyllu var að ræða. Hinsvegar voru fjölmargir vogunarsjóðir, bankar og fjárfestar sem sáu ekki í gegnum Madoff.

Það hefur áður komið fram að opinberar eftirlitsstofnanir sváfu einnig á verðinum. M.a. mun bandaríska fjármálaeftirlitinu hafa borist ábending um að ekki hafi allt verið með felldu hjá Madoff. Sú ábending barst fyrir 10 árum síðan eða um það leiti sem Northfield Information Services ráðlagði fyrrgreindum fjárfesti að koma ekki nálægt starfsemi Madoffs.