Kínverskum milljónum skipt út fyrir bankaábyrgð hjá Glitni

Útgáfa Nyhedsavisen gæti enn verið í gangi ef Morten Lund þáverandi eigandi blaðsins hefði ekki ákveðið að hafna tilboði kínverska auðmannsins Richard Li þegar honum tókst í staðinn að afla sér bankaábyrgðar hjá Glitni.

Þessar upplýsingar koma m.a. fram í nýrri bók um Nyhedsavisen sem ber nafnið Alt går eftir planen eða Allt er á áætlun. Jyllands Posten fjallar um málið í dag og vitnar í bókina. Samkvæmt henni var Richard Li, sem kemur frá Hong Kong, svo gott sem orðinn hluthafi í Nyhedsavisen þann 20. mars í fyrra.

Li hafði að vísu skömmu áður hætt við þátttöku sína í útgáfunni en þegar hinir fyrrum íslensku eigendur blaðsins komu Lund til aðstoðar sendi Li sms-skeyti til Lund sem sagði: we have a deal" eða við höfum samning.

Lund ákvað svo að hafna tilboði Li á síðustu stundu þegar honum hafði tekist að útvega sér 80 milljón danskra kr., eða um 1,6 milljarða kr. bankaábyrgð hjá Glitni. Þessi ábyrgð var upprunalega hugsuð sem trygging fyrir aðkomu Li að útgáfunni.

Lund notaði svo ábyrgðina til að tryggja sér lán frá Straumi og halda þar með sjálfur áfram töglum og höldum í útgáfu Nyhedsavisen.

Síðan segir Jyllands Posten að til að fullkomna ruglið megi nefna að einn stærsti hluthafinn í Glitni hafi verið Stoðir sem aftur voru að stórum hluta í eigu Jóns Ásgeirs Jóhannessonar sem aftur stóð að því að stofna Nyhedsavisen á sínum tíma.