Verðbréfamiðlarar Eik Banka í sigtinu hjá ríkislögreglustjóra

Fjármálaeftirlitið (FME) telur að starfshættir Eik Banka og tveggja verðbréfamiðlara sem störfuðu við viðskipti bankans og við miðlun verðbréfa fyrir hönd viðskiptavina hans feli í sér markaðsmisnotkun. Málið hefur verið sent Ríkislögreglustjóra.

Eins og fram hefur komið í frétt hér á síðunni snýst rannsóknin um viðskipti sem áttu sér stað á tveimur dögum í júní og einum í júlí á síðasta ári. Um var að ræða viðskipti í kauphöllinni.

Fjármálaeftirlitið telur að starfshættir Eik Banka og tveggja verðbréfamiðlara sem störfuðu við viðskipti bankans og við miðlun verðbréfa fyrir hönd viðskiptavina hans feli í sér markaðsmisnotkun.

Tilboði Eik banka um viðskipti með hluti í tveimur félögum voru hreyfð til, ýmist hækkuð sölutilboð þess eða lækkuð kauptilboð, rétt áður en tilboð voru gerð fyrir hönd viðskiptavinar. Leiddi þetta til þess að í einu tilviki hækkaði opinbert dagslokaverð bréfa í tilteknu félagi.

Í öðru tilviki urðu viðskipti á hærra verði en ætla má að viðskiptavinurinn hefði fengið ef Eik banki hefði ekki hækkað sölutilboð sitt nokkrum mínútum áður en lagt var fram kauptilboð viðskiptavinarins.

Í þriðja tilvikinu urðu viðskipti á lægra verði en ætla má að EIK banki hefði fengið ef sölutilboð viðskiptavinarins hefði verið sett inn í tilboðabókina áður en kauptilboð bankans voru lækkuð. Það sem fyrst og fremst gerði slíka starfshætti framkvæmanlega að mati FME var að sömu starfsmenn Eik banka fengust á sama tíma við viðskipti fyrir eigin reikning bankans og miðlun verðbréfa fyrir viðskiptavini þess.