NBA í nótt: Bynum meiddist í sigri Lakers

LA Lakers vann sigur á Memphis í NBA-deildinni í nótt, 115-98, sem féll þó í skuggann á hnémeiðslum Andrew Bynum í leiknum.

Bynum meiddist strax í fyrsta leikhluta og er enn óljóst hversu alvarleg meiðslin eru. Hann hefur verið meðal lykilmanna Lakers á tímabilinu en hann missti af síðustu 46 leikjum síðasta tímabils vegna hnémeiðsla sem hann varð einmitt fyrir í leik gegn Memphis.

„Hann virtist mjög þjáður á vellinum og þetta minnti mikið á það sem gerðist í fyrra," sagði Phil Jackson, þjálfari Lakers.

Liðsfélagi hans, Kobe Bryant, var að keyra upp að körfunni og datt á Bynum með þeim afleiðingum að sá síðarnefndi meiddist og kom ekki meira við sögu í leiknum.

Bryant skoraði 25 stig í leiknum, Pau Gasol var með 24 stig og átta fráköst en þetta var tólfta tap Memphis í röð.

Rudy Gay var með 23 stig og OJ Mayo 21 fyrir Memphis.

New Jersey vann Philadelphia, 85-83. Brook Lopez var með 24 stig og sautján fráköst. Devin Harris bætti við sautján stigum fyrir New Jersey.

New York vann Indiana, 122-113. Al Harrington skoraði 31 stig fyrir New York og David Lee var með 23 stig og sautján fráköst.

Dallas vann Miami, 111-96. Dirk Nowitzky skoraði 30 stig og Jason Terry 20 en þetta var níundi sigur Dallas á Miami í leikjum liðanna í deildakeppninni.

Washington vann LA Clippers, 106-94. Antawn Jamison var með 25 stig og tólf fráköst, Nick Young 22 og nýliðinn JaVale McGee átján sem er persónulegt met hjá honum.

Houston vann Golden State, 110-93. Yao Ming var með 25 stig og ellefu fráköst en Ron Artest var stigahæstur með 27 stig.

Milwaukee vann Atlanta, 110-107. Charlie Villanueva skoraði 27 stig og þeir Richard Jefferson og Ramon Sessions 20 hvor.

San Antonio vann New Orleans, 106-93. Tony Parker var með 25 stig í leiknum þar sem að fyrrnefnda liðið náði þar með góðri forystu á það síðarnefnda í baráttu liðanna um annað sætið í Vesturdeildinni.

Chicago vann Phoenix, 122-111. Ben Gordon og Derrick Rose voru með 26 stig hvor en Leandro Barbosa skoraði 32 fyrir Phoenix.

Portland vann Utah, 122-106. Brandon Roy var með 30 stig fyrir Toronto og Nicolas Batum sextán. Deron Williams skoraði 35 fyrir Utah en það dugði ekki til.