Starfsmenn Baugs í London sendir heim með vikulaun í vasanum

Megninu af starfsmönnum Baugs á skrifstofu félagsins í London var sagt upp í gærdag og þeir sendir heim með vikulaun í vasanum. PricewaterhouseCoopers (PwC) hefur tekið við lyklunum að skrifstofunni og mun reka Baug með á greiðslustöðvuninni stendur.

Samkvæmt frétt um málið í Guardian unnu 30 manns í yfirmannastöðum á skrifstofunni en PwC mun halda fimm þeirra áfram í störfum. Guardian hefur eftir einum starfsmannanna að þeir skilji ekki afhverju þeir fái ekki eðlilega uppsagnargreiðslu þar sem flest fyrirtæki innan Baugs séu í rekstri og skili hagnaði.

Guardian segir að ekki sé ljóst hvort Jón Ásgeir Jóhannesson og Gunnar Sigurðsson muni verða á launaskrá hjá PwC þar sem í ljós hefur komið að þeir munu halda stjórnunarstöðum sínum í nokkrum af þeim félögum sem Baugur á.

Malcolm Walker forstjóri Iceland-verslunarkeðjunnar staðfesti í samtali við Guardian að Jón Ásgeir myndi halda stöðu sinni sem stjórnarformaður Iceland. "Jón var sá sem kom kaupunum á Iceland á koppinn og án hans hefði ekkert orðið úr þeim," segir Walker. "Við viljum að hann veri áfram."