Kortavelta heimilanna minnkar um rúm 14%

Kreditkortavelta heimila dróst saman um 14,3% í janúar-mars í ár miðað við sömu mánuði í fyrra. Debetkortavelta dróst saman um 2,2% á sama tíma.

Þetta kemur fram í nýbirtum Hagvísum Hagstofunnar. Þar segir að samtals dróst innlend greiðslukortavelta heimila í janúar-mars 2009 saman um 8,8%.

Greiðslukortavelta Íslendinga erlendis dróst saman um 26,6% en erlend greiðslukortavelta hérlendis jókst um 86,2% í janúar-mars 2009 miðað við sömu mánuði 2008. Vísitala neysluverðs án húsnæðis hækkaði um 20,6% (miðað við meðaltal vísitölunnar í janúar-mars) sem veldur 24,4% raunlækkun á innlendri greiðslukortaveltu.