Mikil leynd yfir rannsókninni á Al Thani kaupunum

Ólafur Þór Hauksson sérstakur saksóknari um bankahrunið segir að rannsókn á kaupum sjeiksins Al Thani á 5% hlut í Kaupþingi hafi ekki hafist með húsleitum á föstudaginn. Rannsóknin hafi staðið lengi yfir og slóð peninga sé ekki svo auðveldlega afmáð. Hann vill lítið gefa upp um næstu skref sem hann segir geta skaðað rannsóknina. Hann segir þó að á næstu dögum verði ákveðið hvort gögnum verði skilað aftur eða þau haldlögð í lengri tíma.

„Ég get lítið sagt til um hvað við erum að gera nákvæmlega núna. Við höfum verið að vinna úr þessum gögnum og ég get ekkert sagt um hversu margir verða yfirheyrðir eða hverjir það eru. Það eru upplýsingar sem geta nýst þeim sem eiga hlut að máli," segir Ólafur í samtali við fréttastofu.

Húsleitir fóru fram á nokkrum stöðum á föstudag en meðal annars var leitað á heimilum fyrrverand stjórnenda Kaupþings. Rannsóknin snýst um sölu á 5% hlut í Kaupþingi til eignarhaldsfélags í eigu sjeiksins Al Thani.

Ólafur segir að á næstu dögum þurfi menn að taka afstöðu til þess hvort ástæða sé til að haldleggja gögnin eða skila því sem tekið var til baka. Hann segir mikið mál að fá að leita á heimilum manna enda snúist það um stjórnarskrárvarinn rétt manna. „Þó allt hafi farið hér á hliðina fyrir ekki margt löngu þá viljum við samt halda áfram að búa í réttarríki."

Aðspurður um þá gagnrýni að menn séu nokkuð seinir á ferð í þessu máli. Nokkuð sé liðið frá umræddum viðskiptum og auðvelt hafi verið fyrir þá sem hugsanlega eiga aðild að málinu að eyða gögnum.

„Það vill gleymast að þegar bankarnir hrundu fór af stað ákveðin rannsókn hjá Fjármálaeftirlitinu. Þetta mál var búið að vera í ákveðinn tíma í rannsókn hjá þeim og kemur svo til okkar þann 13.mars. Við höfum ekkert verið að endurtaka það sem þeir gerðu heldur tökum upp ákveðinn þráð og það hófst ekki á föstudaginn og ekki þegar við tókum þessi gögn, heldur miklu fyrr. Ég held að ef þú leggur kenninguna um pappírstætarana við þetta þá sé niðrustaðan ekki alveg alslæm," segir Ólafur.

Hann bendir einnig á orð Evu Joly um að slóð peninga sé ekki svo auðveldlega afmáð. Aðspurður um aðkomu hennar að þessu máli segir hann hana ekki fara ofan í einstök mál heldur veiti ráðgjöf almennt.

„Þó þetta mál hangi efst á spýtunni í dag þá er heilmargt annað í gerjun sem við munum fara í."

Hann segir Evu síðast hafa komið hingað til lands í apríl og þá hafi verið með í för norskur ráðgjafi frá efnahagsbrotadeildinni þar í landi. „Hún kemur bara með ákveðna sýn og reynslu og kemur með tillögur og ráðleggur, við tökum síðan afstöðu til þess. Þegar hún hefur verið hér höfum við unnið mikið með henni og haft gagn af."