Íslandsbanki lækkar höfuðstól erlendra bílalána um 23%

Íslandsbanki hefur ákveðið að leiðrétta höfuðstól gengistryggðra og verðtryggðra bílalána og bílasamninga. Leiðréttingin felur í sér að höfuðstóll láns er leiðréttur miðað við ákveðið gengi í lok september 2008.

Í tilkynningu segir að þetta hafi í för með sér að höfuðstóll erlendra bílalána og bílasamninga mun lækka um 23% að meðaltali, m.v. gengið eins og það var 20. október s.l. Höfuðstóll verðtryggðra bílalána og bílasamninga í íslenskum krónum lækkar um 5% að meðaltali.

Þetta hefur í för með sér að lánið færist yfir í íslenskar krónur á breytilegum óverðtryggðum vöxtum. Veittur verður afsláttur af vöxtum fyrstu 12 mánuði lánsins. Vextir verða því 10,5% í stað 13,1% í dag. Ef vaxtabreytingar verða á tímabilinu munu vextir breytast í samræmi við það. Eftir 12 mánuði munu vextir miðast við vaxtatöflu Íslandsbanka Fjármögnunar.

Til þess halda greiðslubyrði í lágmarki stendur viðskiptavinum Íslandsbanka til boða að lengja greiðslutíma bílalánsins, þó aldrei lengur en í þrjú ár og að hámarki 75% af þeim fjölda greiðslna sem eftir er á láninu.

Hægt verður að sækja um leiðréttingu á höfuðstól bílalána og samninga fram til 15. desember næstkomandi. Viðskiptavinur munu geta sótt um á vef bankans, www.islandsbanki.is, prentað út viðeigandi skjöl á einfaldan hátt og skilað þeim undirrituðum í næsta útibú Íslandsbanka um land allt.

Sem dæmi má nefna að lán upp á 2,5 milljónir kr. sem var tekið í nóvember 2007 í erlendri mynt til 84 mánaða, stendur í 4,6 milljónum kr. í dag, og greiðslubyrði eru rúmar 86 þús. kr. Eftir höfuðstólsleiðréttingu lækkar höfuðstóllinn um það bil í 3,5 milljónir kr. og greiðslubyrði láns verður 54 þús., m.v. að viðskiptavinur velji lengingu á lánstíma.