Vísitala framleiðsluverðs lækkaði um 1,6% í mars

Vísitala framleiðsluverðs í mars 2009 var 153,1 stig og lækkaði um 1,6% frá febrúar 2009.

Þetta kemur fram á vefsíðu Hagstofunnar. Þar segir að vísitala framleiðsluverðs fyrir sjávarafurðir var 187,1 stig, sem er lækkun um 1,0% (vísitöluáhrif -0,3%) frá fyrri mánuði og vísitala fyrir stóriðju var 142,4 stig, lækkaði um 5,2% (-1,4%). Vísitalan fyrir matvæli lækkaði um 0,2% frá febrúar og vísitala fyrir annan iðnað hækkaði um 1,6% (0,1%).

Vísitala framleiðsluverðs fyrir vörur sem framleiddar voru og seldar innanlands hækkaði um 0,2% milli mánaða en fyrir útfluttar afurðir lækkaði hún um 2,4% (-1,6%).

Frá mars 2008 hefur vísitala framleiðsluverðs hækkað um 11,6% og verðvísitala sjávarafurða um 19,2%. Á sama tíma hafa afurðir stóriðju lækkað um 15,3% en matvælaverð hefur hækkað um 21,7%