Nýherji skilar hagnaði á þriðja ársfjórðungi

EBIDTA hagnaður Nýherja hf. nam 107 mkr á þriðja ársfjórðungi en þetta kemur fram í uppgjöri fyrirtækisins fyrir þann ársfjórðung. Forstjóri félagsins segir viðsnúning hafa orðið á rekstri félagsins en afkoma af hugbúnaðarverkefnum erlendis var góð á þessu tímabili. Þá segir í tilkynningu frá Nýherja að rekstur Applicon félaga í Danmörku og Svíþjóð sé stöðugur en áform eru um útgáfu á nýju hlutafé.

„Viðsnúningur varð á rekstri Nýherja hf. í þriðja ársfjórðungi frá því sem verið hefur síðustu þrjá ársfjórðunga. EBITDA hagnaður nam 107 mkr og nálgast að vera áþekkur því sem var í öðrum og þriðja ársfjórðungi 2008. Sala á búnaði og lausnum á Íslandi jókst eftir því sem leið á tímabilið, sem gefur varfærnar vísbendingar um betri horfur í sölu á rekstrar- og tækniþjónustu," segir Þórður Sverrisson, forstjóri í tilkynningunni.

Hann segir ennfremur að Nýherji hafi lagt þunga áherslu á að lækka rekstrarkostnað á árinu sem hafi skilað sér í bættri afkomu eftir því sem liðið hefur á árið. Hann telur að áframhaldandi aðhald muni styrkja rekstrarafkomu í fjórða ársfjórðungi.

„Markaðsstaða fyrir hugbúnaðarþjónustu og ráðgjöf á Íslandi hefur kallað á að kannað sé með tækifæri erlendis. Applicon ehf. og TM Software ehf., dótturfélög Nýherja í hugbúnaðarþjónustu, hafa brugðist við miklum samdrætti innanlands með því að leita markvisst eftir verkefnum erlendis og er nú svo komið að yfir þriðjungur tekna þessara félaga kemur af verkefnum fyrir erlenda aðila. Nýherjasamstæðan hefur markað þá stefnu að fjölga enn frekar verkefnum erlendis fyrir ráðgjafa og tæknimenn samstæðunnar, meðal annars með því að nýta góða markaðsstöðu dótturfélaga í Danmörku og Svíþjóð.

Sem lið í að styrkja fjárhagsstöðu Nýherja hf. hefur stjórn félagsins ákveðið að hefja undirbúning að útgáfu og sölu á nýju hlutafé," segir Þórður.