Akureyrarbær bjóði út leigu til líkamsræktarstöðvar

„Samkeppniseftirlitið beinir þeim fyrirmælum til Akureyrarbæjar með vísan til ... samkeppnislaga ... að boðin verði út leiga í kjallara Íþróttahallarinnar við Skólastíg þegar núgildandi leigutímabili lýkur, 31. desember 2010, eða fyrr verði leigusamningi sagt upp. Þá skal Akureyrarbær upplýsa Samkeppniseftirlitið um framkvæmd og niðurstöðu slíks útboðs."

Þetta er ákvörðun Samkeppniseftirlitsins í kvörtunarmáli Átaks Heilsuræktar ehf. gegn útleigu Fasteigna Akureyrarbæjar á aðstöðu í kjallara Íþróttahallarinnar á Akureyri en kjallaraplássið er leigt líkamsræktarstöðinni Vaxtarækt. Leigan nemi aðeins um 524 kr. á fermetrann sem sé langt undir meðalverði verslunnarhúsnæðis í bænum að mati Átaks en meðalverðið sé í kringum 1.500 kr. á fermetrann. Þar að auki hafi Vaxtaræktin ekki verið krafin um greiðslur fyrir rafmagn og hita.

Í umfjöllun Samkeppniseftirlitsins segir m.a.: „Að mati kvartanda leiðir framangreint leiguverð sem Vaxtarræktin greiðir til röskunar á samkeppni meðal líkamsræktarstöðva á Akureyri. Fasteignir Akureyrarbæjar skekki því samkeppni á markaði líkamsræktarstöðva með leigusamningi við Vaxtarræktina m.a. þar sem leigukostnaður sé nokkuð stór þáttur í rekstrarkostnaði líkamsræktarstöðva."

Fasteignir Akureyrarbæjar segja að leiguverðið afmarkist af ástandi leiguhúsnæðisins. „Húsnæðið sé niðurgrafinn gluggalaus kjallari með lofthæð víða um 2,20 m og í lofti séu loftræstistokkar og klóakrör. Þá kemur fram að tafir hafi orðið á því að núverandi leigutaki flytti starfsemi sína í nýtt húsnæði en að því loknu væri ekki fyrirhugað að leigja húsnæðið út aftur fyrir hliðstæða starfsemi," eins og segir í umfjöllun eftirlitsins. Þá segja Fasteignir Akureyrar að ekki hafi verið rukkað fyrir rafmagn og hita vegna mistaka. Bætt hafi verið úr því.

Fram kemur í niðurstöðum Samkeppniseftirlitsins að þetta er ekki í fyrsta sinn sem kvartað er undan þeim kjörum sem Vaxtaræktin nýtur hjá Akureyrarbæ. Árið 2001 kvartaði World Class Akureyri yfir sama hlutnum. Þá vakti eftirlitið athygli Akureyrarbæjar á þeirri skyldu sem hvílir á bænum að raska ekki samkeppnisskilyrðum milli keppinauta með því að hugsanlega undirverðleggja leiguhúsnæði Vaxtaræktarinnar.