Kobe Bryant setti met með 61 stigi í New York

Kobe Bryant var sjóðandi heitur þegar hann mætti með Lakers-lið sitt í Madison Square Garden í New York.

Lakers-liðið hafði sigur 126-117 og skoraði Bryant 61 stig í leiknum sem er það mesta sem leikmaður hefur skorað í byggingunni síðan hún var reist í núverandi mynd árið 1968.

Bryant hitti 19 af 31 skoti sínu utan af velli og úr öllum 20 vítaskotum sínum. Pau Gasol skoraði 31 stig og hirti 14 fráköst fyrir Lakers sem spilaði fyrsta leik sinn án Andrew Bynum síðan hann meiddist um helgina.

Eldra stigameti leikmanns úr gestaliði í Madison Square Garden átti Michael Jordan þegar hann skoraði 55 stig fyrir Chicago árið 1995, en hann var þá nýkominn til baka eftir að hafa lagt skóna á hilluna. Phil Jackson þjálfari Lakers var þá þjálfari Chicago. "Þeir áttu báðir stórleik," sagði Jackson.

Al Harrington var stigahæstur hjá Knicks með 24 stig og David Lee var með 22 stig og 12 fráköst.

Dallas vann góðan útisigur á Orlando 105-95 þar sem heimamenn voru ískaldir fyrir utan þriggja stiga línuna. Dirk Nowitzki skoraði 29 stig fyrir Dallas en Dwight Howard skoraði 35 stig og hirti 11 fráköst fyrir Orlando. Leikstjórnandinn Jameer Nelson, sem á dögunum var valinn í stjörnuliðið, fór úr axlarlið og fer í myndatöku í dag.

Portland skellti New Orleans á útivelli 97-89. New Orleans hafði 17 stiga forystu í leiknum þegar Chris Paul meiddist í nára og kom ekki meira við sögu. Hann fer í myndatöku í dag. David West skoraði 25 stig fyrir New Orleans en LaMarcus Aldridge skoraði 22 stig og hirti 11 fráköst fyrir gestina.

Phoenix rótburstaði Sacramento 129-81 á heimavelli. Amare Stoudemire skoraði 25 stig fyrir Phoenix en John Salmons 19 fyrir Sacramento.

Utah lagði Charlotte 105-89 þrátt fyrir að vera án þriggja fastamanna. Mehmet Okur skoraði 22 stig fyrir Utah en Raymond Felton 16 fyrir gestina.

San Antonio lagði Golden State á útivelli 110-105 í framlengdum leik þar sem heimamenn voru mesti 12 stigum yfir. Tim Duncan skoraði 32 stig og hirti 15 fráköst fyrir San Antonio og Manu Ginobili skoraði 32 stig af bekknum. Stephen Jackson skoraði 33 stig og gaf 11 stoðsendingar fyrir Golden State.

Memphis lagði Washington á útivelli 113-97. OJ Mayo skoraði 33 stig fyrir Memphis en Antawn Jamison 33 stig og 13 fráköst fyrir Washington.

Miami vann auðveldan sigur á arfaslöku liði LA Clippers 119-95 þar sem Dwyane Wade skoraði 32 stig fyrir Miami en Zach Randolph var með 21 stig fyrir Clippers.

Staðan í NBA deildinni