Eignir lánafyrirtækja hækkuðu um 36 milljarða í júní

Eignir ýmissa lánafyrirtækja námu 1.300 milljarða kr. í lok júní og hækkuðu um 36,3 milljarða kr. í mánuðinum.

Þetta kemur fram í hagtölum Seðlabankans. Þar segir að útlán og eignarleigusamningar námu 1.132 milljarða kr. í lok mánaðarins og hækkuðu um 23,3 milljarða kr. frá fyrra mánuði.

Innstæður í Seðlabankanum drógust saman um 4,6 milljarða kr. milli mánaða, fóru úr 16,5 milljörðum kr. í 11,9 milljarða kr. en kröfur á lánastofnanir hækkuðu um 12,4 milljarða kr. Eigið fé nam 80,1 milljarði kr. í lok júní og hækkaði um 9,6 milljarða kr. milli mánaða.