Nafni Eimskips verði breytt í A1988 hf.

Eftirfarandi tillaga verður sett fyrir næsta hluthafafund Eimskips: „Hluthafafundur Hf. Eimskipafélags Íslands haldinn 8. september samþykkir að breyta nafni félagsins í A1988 hf. Skal 1. gr. samþykkta félagsins breytast og verða svohljóðandi; "Félagið er hlutafélag og nafn þess er A1988 hf.

Þá verður einnig lögð fyrir fundinn tillaga um framsal á eignum Eimskips til L1003 ehf. gegn afhendingu hluta í L1003. Tillagan hljóðar svo:

„Hluthafafundur Hf. Eimskipafélags Íslands haldinn 8. september 2009 staðfestir heimild til stjórnar um að framselja allar eigur félagsins til skiparekstrar til Eimskip Ísland ehf. og hækka þannig hlutafé þess félags og fá sem gagngjald hluti í Eimskip Ísland ehf. Jafnframt staðfestir fundurinn heimild til stjórnar félagsins að framselja framangreinda hluti í Eimskip Ísland ehf., ásamt öllum öðrum eignum félagsins að frátöldum 51% hlut í Eimskip Tango ehf., til félagsins L1003 ehf. gegn afhendingu hluta í L1003 ehf."

Í greinargerð með tillögunni segir að hún sé liður í nauðasamningi félagsins sem staðfestur var þann 28. ágúst 2009 af Héraðsdómi Reykjavíkur. Í samningum sem gerðir voru í tengslum við nauðasamningsfrumvarp félagsins var gert ráð fyrir að skiparekstur félagsins yrði færður til nýs félags, L1003 ehf. (sem síðar mun fá nafnið Eimskipafélag Íslands ehf.).

Samkvæmt nauðasamningi félagsins munu kröfuhafar þess fá hluti í L1003 ehf. Sem greiðslu á kröfum sínum á hendur félaginu.

Þeim ráðstöfunum sem hér er fjallað um eru gerð gerð ítarleg skil í greinargerð fyrir kröfuhafa sem fylgdi nauðasamningsfrumvarpi félagsins. Með tillögu þessari er staðfest heimild stjórnar til að ganga frá þeim samningum sem kveðið er á um nauðasamningi félagsins.